އިބްނު ތައިމިއްޔާ ވިދާޅުވިއެވެ:
ނަމާދުކުރާ ގޮތަށް ބަލާއިރު އޭގެ އެއް ޝިޢާރަކީ ބިސްމީގެ މައްސަލައެވެ. ފަހެ ބިސްމިއަކީ ޤުރްއާނުގެ (އެބަހީ އަލްޙަމްދުގެ) އާޔަތެއްކަން ސާބިތު ކުރުމާއި ނަފީ ކުރުމުގައްޔާއި، (ނަމާދުގައި) ބިސްމި ކިޔުމާ މެދުގައި މީސްތަކުން ވަނީ އަރައިރުން ވެފައެވެ. އަދި މައްސަލައިގެ ދެ ފަރާތުން ވެސް ވަނީ އޭގެ ބައެއް ވާހަކަތަކުން ބާވަތެއްގެ ޖާހިލުކަމަކާއި އަނިޔާވެރިކަމެއް ފާޅުވާ ކަހަލަ ލިޔުންތަކެއް ލިޔެފައެވެ. ކަމަކީ ކިތަންމެހައި ވެސް އާދައިގެ ކަމަކަށް ވާ ހިނދުގައެވެ. ފަހެ މި މައްސަލައާއި މިކަހަލަ މައްސަލަތަކުގައި ތަޢައްޞުބު ވުމީ އަހަރެމެންނަށް ނަހީ ކުރައްވާފައިވާ ބައިބައިވުމާއި އިޚްތިލާފުގެ ޝިޢާރެކެވެ. އެހެނީ މިކަމަށް ގޮވާލާ ސަބަބަކީ އުންމަތުގެ މެދުގައި ޚިލާފު ވެފައިވާ ކަންކަން ފައުޅު ކުރުމެވެ. އެހެންޏާ މި މައްސަލަތަކަކީ ޚިލާފީ މައްސަލަތަކުގެ ތެރެއިން މުހިންމުކަމުގެ ގޮތުން އެންމެ ލުއި މައްސަލަތަކުގެ ތެރޭ ހިމެނޭ ކަންކަމެވެ. ބައިބައިވުމުގެ ޝިޢާރުތައް ފައުޅު ކުރުމަށް ޝައިޠާނާ ގޮވާ ގޮވެލި ނުވާނަމައެވެ. [مجموع الفتاوى (22/405)]
އެއަށްފަހު ބިސްމީގެ މައްސަލައިގެ ޤައުލުތައް ގެންނެވުމަށްފަހު ވިދާޅުވިއެވެ.
މިފަދަ މުސްތަޙައްބު ކަންކަން ދޫކޮށްލައިގެން ވިޔަސް ހިތްތައް އެއްބައިކުރަން ޤަޞްދުކުރުން އެދެވިގެން ވެއެވެ. އެހެނީ މިކަންކަން ކުރުމުގެ މަޞްލަޙަތަށްވުރެ ހިތްތައް އެއްގަލަކަށް އެރުވުމުގެ މަޞްލަޙަތަކީ ދީނުގައި މާ އިސްކަންދެވޭ މަޞްލަޙަތެކެވެ. ގެފުޅުގެ ބިނާކޮށްފައިހުރި ގޮތް ބަދަލު ނުކުރައްވައި ނަބިއްޔާ ﷺ ދޫކޮށްލެއްވި ފަދައިންނެވެ. އެއީ އެ ގެފުޅު ހުރިގޮތަށް ބެހެއްޓުމުގައި ހިތްތައް އެއްބައިކުރުން އެކުލެވިގެން ވާތީއެވެ. އަދި ޢުޘްމާނުގެފާނު ދަތުރުމަތީގައި [ޤަޞްރުކުރެވޭ] ނަމާދު ފުރިހަމައަށް ކުރެއްވުމުން އިބްނު މަސްޢޫދު އެކަލޭގެފާނަށް އިންކާރު ކުރެއްވުމަށްފަހުގައި ވެސް އެކަލޭގެފާނުގެ ފަހަތްޕުޅުގައި ފުރިހަމައަށް ކުރެއްވި ފަދައިންނެވެ. އަދި ވިދާޅުވިއެވެ. ޚިލާފުވުމަކީ ނުބައިކަމެކެވެ. [مجموع الفتاوى (22/407)]