އައްޝައިޚް އަބޫ ޢަބްދިﷲ މުޙައްމަދު ބިން ސަޢީދު އަޙްމަދު ރަސްލާންއަކީ މިސްރުގެ ދީނީ ޢިލްމުވެރިއެކެވެ.
އޭނާ އުފަންވެވަޑައިގަތީ މިޞްރުގެ މުނޫފިއްޔާ ގަވަރުނޭޓުގެ އަޝްމޫން ސިޓީގެ ސުބްކުލް އަޙަދުގައި 23 ނޮވެމްބަރ 1955މ. ގައެވެ.
އެ ރަށުގެ މަސްޖިދުއް ޝަރުޤީގައި ހުކުރު ޚުޠުބާ އިއްވައި، ދަރުސްތައް ދެއްވައެވެ. އަދި އެކި ޤައުމުތަކުގައި ލެކްޗަރތައް ދެއްވައެވެ.
ތަޢުލީމާއި ސަނަދުތައް
- އަޒްހަރު ޔުނިވަރސިޓީން މެޑިސިންއާއި ސާރޖަރީގެ ރޮނގުން ބެޗްލަރސް ޑިގްރީ ހާސިލުކުރެއްވިއެވެ.
- ޝުޢުބަތުއްދިރާސާތިލް އިސްލާމިއްޔާގެ އަރަބި ޑިޕާޓްމަންޓުން އާޓްސް ލައިސަންސް ހާސިލުކުރެއްވިއެވެ.
- ޙަދީޘް ޢިލްމުން މާސްޓަރސް ޑިގްރީ، ފުރަތަމަ ޝަރަފުގެ ދަރަޖައިގައި ހާސިލުކުރެއްވިއެވެ. ތީސިސްގެ މައުޟޫޢަކީ ”މުޙައްދިޘުންގެ އަރިހުގައި ރިވާޔަތުގެ ޟަވާބިޠުތައް“ މިއެވެ.
- ޙަދީޘް ޢިލްމުގައި ޑޮކްޓަރޭޓް ޑިގްރީ، ފުރަތަމަ ޝަރަފުގެ ދަރަޖައިގައި ހާސިލުކުރެއްވިއެވެ. ދިރާސާގެ މައުޟޫޢަކީ ”ކުތުބުއްސިއްތާގެ ރާވީންގެ ތެރެއިން ބިދުޢަވެރިއެއް ކަމަށް ބެނެވިފައިވާ ރާވީން“ މިއެވެ.
- މީގެ އިތުރުން ނަބިއްޔާ ﷺ އާ ހަމައަށް ސަނަދު ގުޅިފައިވާ 40 ޙަދީޘެއްގެ އިޖާޒާ ލިބިވަޑައިގެންފައިވެއެވެ. މި ޙަދީޘްތަކަށް ކިޔަނީ ”އަލްއަރްބަޢޫނަލް ބުލްދާނިއްޔާ“ އެވެ.
މީގެ އިތުރުން، ޝައިޚުލް އިސްލާމް އަބުލް ޢައްބާސް އަޙްމަދު ބިން ޢަބްދުލްޙަލީމް އިބްނު ތައިމިއްޔާއާއި އޭނާގެ އިސް ދަރިވަރު އަލްޢައްލާމާ އިބްނުލް ޤައްޔިމް ފަދަ ބޮޑެތި މުޙައްޤިޤު ޢިލްމުވެރިންގެ ޢިލްމުން އޭނާއަށް ވަނީ އަސަރު ކުރުވާފައެވެ.
މަޞްދަރު: https://www.rslan.com/targma.php