މީގެ އަޞްލަކީ ސުލޫކާއި ތަޒްކިޔާއާ ބެހޭގޮތުން އަބޫ ޙާމިދު އަލްޣަޒާލީ (އަވަހާރަވީ: 505ހ.) ލިޔުއްވި މަޝްހޫރު ފޮތްކަމުގައިވާ ”އިޙްޔާއު ޢުލޫމިއްދީން“ އެވެ. އެ ފޮތުގައި އެތައް ޟަޢީފު ޙަދީޘްތަކަކާއި ބާޠިލު ވާހަކަތަކެއް އެކުލެވިފައިވާތީ، އިބްނުލްޖައުޒީ (އަވަހާރަވީ: 597ހ.) ވަނީ އެ ބައިތައް އުނިކުރައްވައި ”މިންހާޖުލް ޤާޞިދީން“ ގެ ނަމުގައި ފޮތް އަލުން ތަހުޛީބުކުރައްވާފައެވެ.
އެއަށްފަހު، އިބްނު ޤުދާމާ އަލްމަޤްދިސީ (އަވަހާރަވީ: 689ހ.) ވަނީ ފޮތުގެ މައިގަނޑު މައުޟޫޢާ ނުގުޅޭ ފިޤުހީ މައްސަލަތައް އުނިކުރައްވައި، އަމިއްލަފުޅު ޢިބާރާތުން އެ ފޮތް ”މުޚްތަޞަރު މިންހާޖިލް ޤާޞިދީން“ ގެ ނަމުގައި ވަރަށް ފުރިހަމައަށް ޚުލާޞާކުރައްވާފައެވެ.