މިއީ އައްޢައްލާމާ ޢަބްދުއްރަޙްމާން ބިން ނާޞިރު އައްސިޢުދީ ލިޔުއްވި މަޝްހޫރު ތަފްސީރު ފޮތް ”ތައިސީރުލް ކަރީމުލް މައްނާން ފީ ތަފްސީރިލް ޤުރްއާން“ ނަމަކަށް ކިޔާ ތަފްސީރު ފޮތުގެ ޚުލާޞާއެވެ. އެ ތަފްސީރުގެ ބައެއް ބައިތައް ޚިޔާރުކޮށް ޤުރްއާނުގެ މައުޟޫތަކުގެ ތަރުތީބުން، ކޮންމެ މައުޟޫޢަކުން ވެސް ބައެއް އާޔަތްތައް ޚިޔާރު ކުރެއްވުމަށް ފަހު ޚުލާޞާކޮށް ތަފްސީރު ކުރެއްވިއެވެ.
މި ފޮތުގެ މުޤައްދިމާގައި ޝައިޚު ވިދާޅުވިއެވެ:
…ފަހެ، އަހުރެން މީގެ ކުރިން ވާނީ ޤުރުއާން ތަފްސީރުގެ ދިގު ފޮތެއް ލިޔެފައެވެ. އެ ފޮތުގެ ދިގުކަމުން އެ ކިޔަން ފަށާ މީހާއަށް ކިޔުމުގައި ދެމިހުރެވޭ ގޮތެއް ނުވެއެވެ. އަދި އެ ފޮތް ޝާއިޢު ކުރުމުގެ ޢަޒުމު ބަލިކަށިވެދެއެވެ. ފަހެ، ކަންކަން ދަންނަ ހެޔޮއެދޭ ބައެއް ބޭފުޅުން އަހުރެންނަށް އިޝާރާތް ކުރެއްވީ، އެހައި ދިގުނޫން ފޮތެއް ލިޔުމަށެވެ. ތަފްސީރުގެ ޚުލާޞާ ހިމެނޭ ގޮތުގައެވެ. މި ފޮތުގައި އަހަރެމެން ވާހަކަ ދައްކާނީ ޤުރްއާނުގައި އެކުލެވިގެންވާ ޢިލްމުތަކާއި މަޤްޞަދުތަކުގެ މައުޟޫޢުތަކުގެ ތެރެއިން ހޮވާލެވޭ ބައެއް އާޔަތްތަކުގެ ތަފްސީރާމެދުގައެވެ. ފަހެ، މި ބަރަކާތްތެރި ރައުޔުގެ މަތީގައި މަސައްކަތް ކުރުމަށް އަހުރެން ﷲގެ ޙަޟްރަތުން މަދަދަށް އެދުނީމެވެ.
އެއަށްފަހު ވިދާޅުވިއެވެ:
ފަހެ، ޤުރްއާނުގެ ބައެއް ތަންތަންކޮޅުގެ ތަފްސީރު އެނގުމަކީ، ބާކީބައި އެނގުމަށް އެންމެ ބޮޑަށް އެހީވެދޭނެ އެއް ކަމެވެ. އަދި ﷲ ތަޢާލާ އެފޮތް ލައްވާފައިވަނީ، ފައިދާހުރި ޢިލްމުތަކާއި، މަތިވެރިވެގެންވާ ފުރިހަމަ މާނަތައް އެކުލެވޭ، ތަކުރާރުކޮށް ކިޔެވޭ ފޮތެއް ކަމުގައެވެ. މިއީ ﷲ ތަޢާލާ އެކަލާނގެ ފޮތް ފަސޭހަކޮށްދެއްވުމުގެ ތެރެއިންވާ ކަމެކެވެ.
ﷲ ތަޢާލާ ވަޙީ ކުރައްވާފައި ވެއެވެ.
﴿ وَلَقَدْ يَسَّرْنَا الْقُرْآنَ لِلذِّكْرِ فَهَلْ مِنْ مُدَّكِرٍ﴾ [ ޤަމަރު 17] ”ހަމަކަށަވަރުން، ތިމަންރަސްކަލާނގެ ޤުރްއާން ހަނދުމަ ކުޅައުމަށް ފަސޭހަކޮށް ދެއްވީމެވެ. ފަހެ، ހަނދުމަ ކުރާ މީހަކު ވޭހެއްޔެވެ؟“