ހަތަރުވަނަ މައްސަލައަކީ މާތްވެގެންވާ ޝަރީޢަތް ފިޔަވައި އެހެން އެއްޗެއް ޙުކުމްވެރިކުރުމެވެ.
އެކަމަކީ ބަވާޙް ކުފުރެއް ކަމާއި، ﷲއާ ޝަރީކުކުރުން ކަމުގައި ކީރިތި ޤުރްއާނުގައި ވަނީ ބަޔާން ކުރައްވާފައެވެ.
އަހަރެމެންގެ ނަބިއްޔާ އަރިހު ސުވާލު ދެންނެވުމަށް މައްކާގެ މުޝްރިކުންނަށް ޝައިޠާނާ ވަސްވާސްދިނެވެ. ”ކަންބަޅިއެއް މަރުވެ މުޅައެއްޗެއްގެ ގޮތުގައި ވާހިނދު، އޭތި ޤަތުލުކުރި ފަރާތަކީ ކާކު ހެއްޔެވެ؟“ އެކަލޭގެފާނު ޙަދީޘް ކުރެއްވިއެވެ. ”އޭތި ޤަތުލުކުރެއްވީ ﷲއެވެ.“ ދެން އެކަލޭގެފާނަށް ދެންނެވުމަށް ޝައިޠާނާ އެއުރެންނަށް ވަސްވާސްދިނެވެ. ”ތިޔަބައިމީހުންގެ އަތްތަކުން ކަތިލާތަކެތި ޙަލާލުވެފައި، ﷲގެ މާތް އަތްޕުޅުން ކަތިލައްވާ ތަކެތި ޙަރާމް ވަނީ ހެއްޔެވެ! އެހެންވެއްޖެއްޔާ ތިޔަބައިމީހުން ﷲއަށްވުރެ މާ ހެޔޮކަންބޮޑުތާއެވެ!“ ﷲ ވަޙީ ކުރެއްވިއެވެ. ﴿وَإِنَّ الشَّيَاطِينَ لَيُوحُونَ إِلَى أَوْلِيَائِهِمْ لِيُجَادِلُوكُمْ وَإِنْ أَطَعْتُمُوهُمْ إِنَّكُمْ لَمُشْرِكُونَ﴾ [އަލްއަންޢާމް 121]. ”އަދި ހަމަކަށަވަރުން، ތިޔަބައިމީހުންނާ ޖަދަލު ކުރުމަށް ޝައިޠާނުން އެއުރެންގެ ވާގިވެރީންނަށް ވަސްވާސް ދޭނެއެވެ. ތިޔަބައިމީހުން، އެއުރެންނަށް ކިޔަމަންވެއްޖެނަމަ ހަމަކަށަވަރުން، ތިޔަބައިމީހުންނަކީ ވެސް، މުޝްރިކުންކަން ކަށަވަރެވެ.“
﴿إِنَّكُمْ لَمُشْرِكُونَ﴾ މި ޖުމްލައިގެ ކުރިއަށް ف ވަދެފައި ނެތުމަކީ، ހުވައިކުރުމުގެ މަގުން އަންނަ ل އެތަނަށް މިންވަރުކުރުމަށް އޮތް ފާޅުކަން ބޮޑު ޤަރީނާއެކެވެ. ފަހެ އެއީ ﷲ ކުރައްވާފައިވާ ހުވައެކެވެ. މުޅަތަކެތި ޙަލާލުކުރުމުގައި ޝައިޠާނާގެ ޝަރުޢުކުރުމަށް ތަބާވެއްޖެ މީހަކީ މުޝްރިކެއް ކަމަށް މި އާޔަތުގައި ﷲ ވަނީ ހުވައިކުރައްވާފައެވެ. އައި އެކަމަކީ އިސްލާމީ މިއްލަތުން އިންސާނާ ބޭރުކޮށްލަނިވި ބޮޑު ޝިރުކެއް ކަމަށް މުސްލިމުން ވަނީ އިޖްމާޢު ވެފައެވެ.
އަދި ޤިޔާމަތްދުވަހުން އެކަން ކުރި ފަރާތްތަކަށް ﷲ މަލާމާތް ރައްދުކުރައްވާނެއެވެ. ﴿ أَلَمۡ أَعۡهَدۡ إِلَيۡكُمۡ يَٰبَنِيٓ ءَادَمَ أَن لَّا تَعۡبُدُواْ ٱلشَّيۡطَٰنَۖ إِنَّهُۥ لَكُمۡ عَدُوّٞ مُّبِينٞ ٦٠ وَأَنِ ٱعۡبُدُونِيۚ هَٰذَا صِرَٰطٞ مُّسۡتَقِيمٞ﴾ [ޔާސީން 60–61] ”އޭ އާދަމުގެ ދަރިންނޭވެ! ތިޔަބައިމީހުން ޝައިޠާނާއަށް އަޅުކަން ނުކުރުމަށް ތިމަންރަސްކަލާނގެ ތިޔަބައިމީހުންނަށް އަމުރު ނުކުރައްވަން ހެއްޔެވެ؟ ހަމަކަށަވަރުން، އޭނާޔަކީ ތިޔަބައިމީހުންނަށް ހުރި، ފާޅުވެގެންވާ ޢަދާވަތްތެރިޔެކެވެ. އަދި ތިޔަބައިމީހުން ތިމަންރަސްކަލާނގެއަށް އަޅުކަން ކުރާށެވެ! މިއީ ސީދާވެގެންވާ ތެދުމަގެވެ.“
އަދި އެކަލާނގެ ޚަލީލު ވިދާޅުވި ބަސްފުޅު އެކަލާނގެ ވަޙީކުރައްވާފައި ވެއެވެ. ﴿يَٰٓأَبَتِ لَا تَعۡبُدِ ٱلشَّيۡطَٰنَ﴾ [މަރްޔަމް 44] ”އޭ ބައްޕާއެވެ! ޝައިޠާނާއަށް އަޅުކަން ނުކުރާށެވެ!“ އެބަހީ: ކުފުރާއި ފާފަތަކުގެ ތެރެއިން އެކަލޭގެ ޝަރުޢުކުރާ ކަންތައްތަކަށް ތަބާ ނުވާށެވެ.
އަދިވެސް ﷲ ވަޙީކުރައްވާފައި ވެއެވެ. ﴿إِنْ يَدْعُونَ مِنْ دُونِهِ إلا إِنَاثًا وَإِنْ يَدْعُونَ إلا شَيطَانًا مَرِيدًا﴾ [އައްނިސާ 117] ”އެކަލާނގެ ފިޔަވައި އަންހެން (ނަންތަކެއް ކިއިގެންވާ) ބުދުތަކަކަށް މެނުވީ، އެއުރެން އަޅުކަމެއް ނުކުރެތެވެ. އަދި، ނުބައިކަމާއި ނުކިޔަމަންތެރިކަން ބޮޑުވެގެންވާ ޝައިޠާނާއަށް މެނުވީ، އެއުރެން އަޅުކަމެއް ނުކުރެތެވެ.“ އެބައީ އެއުރެން ޝައިޠާނާ ގެނައި ޝަރީޢަތަށް ތަބާވީތީ އެއުރެން އެ ޝައިޠާނާއަށް މެނުވީ އަޅުކަން ކުރިކަމަށް ނުވެއެވެ.
އަދިވެސް އެކަލާނގެ ވަޙީކުރެއްވިއެވެ. ﴿وَكَذَلِكَ زَيَّنَ لِكَثِيرٍ مِنَ الْمُشْرِكِينَ قَتْلَ أَوْلَادِهِمْ شُرَكَاؤُهُمْ﴾ [އަލްއަންޢާމް 137]. ”ހަމައެފަދައިން، މުޝްރިކުންގެ ގިނަ މީހުންނަށް އެއުރެންގެ ދަރިން މެރުމަށް، އެއުރެންގެ ޝަރީކުން، ޒީނަތްތެރިކޮށް ދެއްކިއެވެ.“ އެ ޝައިޠާނުންނަކީ އެމީހުންގެ ޝަރީކުން ކަމުގައި ﷲ އެ ވަނީ ނަންދެއްވާފައެވެ. އެއީ ﷲއަށް އުރެދި އެއުރެންގެ ދަރީން މެރުމުގައި އެ ޝައިޠަނުންނަށް ކިޔަމަންގަތީތީއެވެ.
﴿اتَّخَذُوا أَحْبَارَهُمْ وَرُهْبَانَهُمْ أَرْبَابًا﴾ [އައްތައުބާ 31] ”އެއުރެންގެ ޢިލްމުވެރީންނާއި، ފާދިރީންނާއި…، މިއީ ﷲ ފިޔަވައި އިލާހުން ކަމުގައި އެއުރެން ހެދޫއެވެ.“ މި އާޔަތާ މެދު ޢަދިއްޔު ބިން ޙާތިމް ނަބިއްޔާ ﷺ އަރިހު ސުވާލު ދެންނެވުމުން ޖަވާބުގައި، އެއީ ﷲ ޙަލާލު ކުރައްވާފައިވާ ތަކެތި ޙަރާމް ކުޅައުމުގައްޔާއި، އެކަލާނގެ ޙަރާމްކުރެއްވި ތަކެތި ޙަލާލު ކުޅައުމުގައި އެބައިމީހުން އެއުރެންނަށް ތަބާވުން ކަމުގައި ޙަދީޘް ކުރެއްވިއެވެ. މި ކަމަކީ އެކަމާމެދު ދެބަސްވުމެއް ނެތް ކަމެކެވެ.
﴿أَلَمۡ تَرَ إِلَى ٱلَّذِينَ يَزۡعُمُونَ أَنَّهُمۡ ءَامَنُواْ بِمَآ أُنزِلَ إِلَيۡكَ وَمَآ أُنزِلَ مِن قَبۡلِكَ يُرِيدُونَ أَن يَتَحَاكَمُوٓاْ إِلَى ٱلطَّٰغُوتِ وَقَدۡ أُمِرُوٓاْ أَن يَكۡفُرُواْ بِهِۦۖ وَيُرِيدُ ٱلشَّيۡطَٰنُ أَن يُضِلَّهُمۡ ضَلَٰلَۢا بَعِيدٗا﴾ [އައްނިސާ 60] ”ކަލޭގެފާނަށް ބާވައިލައްވާފައިވާ ފޮތަށާއި، ކަލޭގެފާނުންގެ ކުރިން ބާވައިލައްވާފައިވާ ފޮތްތަކަށް، އީމާން ވެގެން ތިބިކަމަށް ބުނާ މީހުން ކަލޭގެފާނު ދެކެވަޑައިނުގަންނަވަމު ހެއްޔެވެ؟ އެއުރެން ޙުކުމް ލިބިގަންނާން، އުރެދުންތެރިކަން ބޮޑުފަރާތަށް ދިއުމަށް އެއުރެން އެދެތެވެ. ހަމަކަށަވަރުން، އެފަރާތަށް ކާފިރު ވުމަށް އެއުރެންނަށް އަމުރު ކުރައްވާ ޙާލުގައެވެ. އަދި، ޝައިޠާނާ އެދެނީ، (ޙައްޤު މަގުން) ދުރުވެގެންވާ މަގުފުރެދުމަކުން، އެއުރެން މަގުފުރެއްދުމަށެވެ.“
﴿وَمَنْ لَمْ يَحْكُمْ بِمَا أَنْزَلَ اللَّهُ فَأُولَئِكَ هُمُ الْكَافِرُونَ﴾ [އަލްމާއިދާ 44] ”الله ބާވައިލެއްވި ޙުކްމުން ޙުކުމް ނުކުރާމީހާ (ދަންނާށެވެ!) ފަހެ، އެއުރެން އެއީ ހަމަ ކާފިރުންނެވެ.“
﴿أَفَغَيرَ اللَّهِ أَبْتَغِي حَكَمًا وَهُوَ الَّذِي أَنْزَلَ إِلَيكُمُ الْكِتَابَ مُفَصَّلًا وَالَّذِينَ آتَينَاهُمُ الْكِتَابَ يَعْلَمُونَ أَنَّهُ مُنَزَّلٌ مِنْ رَبِّكَ بِالْحَقِّ فَلَا تَكُونَنَّ مِنَ الْمُمْتَرِينَ﴾ [އަލްއަންޢާމު 114] ”(ކަލޭގެފާނު ވިދާޅުވާށެވެ!) ޙުކުމްކުރާ މީހަކު ކަމުގައި الله ނޫން ފަރާތެއް އަހުރެން އެދޭނެ ހެއްޔެވެ؟ އެކަލާނގެއީ، (ޙައްޤާއި ބާޠިލު) ތަފްޞީލު ކޮށް ބަޔާންކުރައްވާފައިވާ ގޮތުގައި، ތިޔަބައިމީހުންނަށް ފޮތް ބާވައިލެއްވި ކަލާނގެއެވެ. އަދި އެއީ، ކަލޭގެފާނުގެ ވެރިރަސްކަލާނގެ ޙަޟްރަތުން ޙައްޤު ގޮތާއިގެން ބާވައިލެއްވި ފޮތެއްކަން، ތިމަންރަސްކަލާނގެ އެއުރެންނަށް ފޮތްދެއްވި މީހުން ދަނެތެވެ. ފަހެ، ޝައްކުކުރާ މީހުންގެ ތެރެއިން ކަލޭގެފާނު ވެވަޑައިނުގަންނަވާހުށިކަމެވެ!“
އަދިވެސް އެކަލާނގެ ވަޙީ ކުރެއްވިއެވެ. ﴿وَتَمَّتْ كَلِمَتُ رَبِّكَ صِدْقًا وَعَدْلًا لَا مُبَدِّلَ لِكَلِمَاتِهِ وَهُوَ السَّمِيعُ الْعَلِيمُ﴾ [އަލްއަންޢާމު 115] ”އަދި ކަލޭގެފާނުގެ ވެރިރަސްކަލާނގެ ކަލިމަފުޅު ތެދުވެރިކަމާއި، ޢަދުލުވެރި ކަމުގައި ފުރިހަމަވެއްޖެއެވެ. އެކަލާނގެ ކަލިމަފުޅުތައް ބަދަލުކުރެވޭނެ އެއްވެސް ފަރާތެއް ނުވެއެވެ. އަދި އެކަލާނގެއީ، މޮޅަށް އައްސަވާވޮޑިގެންވާ މޮޅަށް ދެނެވޮޑިގެންވާ ރަސްކަލާނގެއެވެ.“ އެކަލާނގެ މި ބަސްފުޅުގައި: ﴿صِدْقًا﴾ އޭ އެ ވަނީ ޚަބަރުފުޅުތަކުގައި ތެދުވެރި ވާހަކައެވެ. ﴿وَعَدْلًا﴾، އޭ އެ ވަނީ ޙުކުމްފުޅުތަކުގައި ޢަދުލުވެރި ވާހަކައެވެ. ﴿أَفَحُكْمَ الْجَاهِلِيَّةِ يَبْغُونَ وَمَنْ أَحْسَنُ مِنَ اللَّهِ حُكْمًا لِقَوْمٍ يُوقِنُونَ﴾ [އަލްމާއިދާ 50]. ”ފަހެ، އެއުރެން އެދެނީ ޖާހިލީ ޒަމާނުގެ ޙުކުމް ހެއްޔެވެ؟ ޔަޤީން ކުރާ ބަޔަކަށް، ﷲއަށްވުރެ ޙުކުމްކުރެއްވުމަށް މޮޅީ ފަހެ ކާކުހެއްޔެވެ؟“
ތަރުޖަމާ
ޙައްސާން ޢަބްދުއްރައްޒާޤް
އަދާހަމަ
21 ސެޕްޓެންބަރު 2024
ލައިސެންސް
މި ތަރުޖަމާގެ ކޮޕީރައިޓާ ގުޅޭ އެންމެހައި ޙައްޤުތައް ލިބިގެން ވަނީ ތަރުޖަމާ ކުރި ފަރާތަށެވެ.
