ނޯޓު
މިއީ އައްޝައިޚް މުޙައްމަދުލް އަމީން އައްޝަންޤީޠީ ލިޔުއްވި ”އިސްލާމް ދީނަކީ ފުރިހަމަ ދީނެކެވެ.“ މި ފޮތުގެ ތަރުޖަމާ ގެނެސްދޭ ސިލްސިލާގެ ނުވަވަނަ ބައެވެ.

އަށްވަނަ މައްސަލައަކީ: ކާފިރުން މުސްލިމުންގެ މައްޗަށް ގަދަވެ­ގަތުމެވެ.

‌‌

ރަސޫލުﷲ ﷺ ގެ މާތް އަޞްޙާބުންގެ މެދުގައި އެކަލޭގެފާނު ހުންނަވަނި­ކޮށް އެ ބޭކަލުން މި މައްސަލައާ މެދު ސުވާލު އުފެއްދެވިއެވެ. އަދި އެކަމާމެދުގައި الله އެކަލާނގެ ފޮތުގައި، ސަމާވީ ފަތުވާ­އެއް ބާވައިލައްވައި އެ އޮޅުން ފިލުވައިލެއްވިއެވެ.

އުޙުދު ހަނގުރާމައިގެ ދުވަހު މުސްލިމުންނަށް ކުރިމަތިވި ކަންތައްތައް ކުރިމަތިވުމުން އެއުރެން އެކަމާ ކަންބޮޑުވެ­ވަޑައިގެން ދެންނެވޫއެވެ. ތިމަންމެންނީ ޙައްޤުގެ މަތީގައި ތިބި ބަޔަކު ކަމުގައި ވެފައި، އެބައި­މީހުންނަކީ ބާޠިލްގެ މަތީގައި ތިބި ބަޔަކު ކަމުގައި ވާއިރު، މުޝްރިކުންނަށް ތިމަންމެންގެ މައްޗަށް ގަދަވެވެނީ، އަދި ތިމަންމެންގެ މައްޗަށް އެބައި­މީހުންނަށް ކާމިޔާބު ލިބެނީ ކިހިނަކުން ހެއްޔެވެ؟

ފަހެ، ﷲ އެބޭ­ކަލުންނަށް އެކަމުގައި ފަތުވާ ދެއްވީ އަންނަނިވި ވަޙީ ބަސް­ފުޅުންނެވެ. ﴿أَوَلَمَّا أَصَابَتْكُمْ مُصِيبَةٌ قَدْ أَصَبْتُمْ مِثْلَيهَا قُلْتُمْ أَنَّى هَذَا قُلْ هُوَ مِنْ عِنْدِ أَنْفُسِكُمْ﴾ [އާލު ޢިމްރާން 165] ”މިކަންތައް އައީ ކޮންތާކުންހޭ ތިޔަބައި­މީހުން ބުނީ، ތިޔަބައި­މީހުންނަށް މުޞީބަތެއް އައިސް ޖެހުނީމާ ހެއްޔެވެ؟ ހަމަ­ކަށަވަރުން، އެ މުޞީބަތުގެ ދެގުނަ (އެއުރެންނަށް) ތިޔަބައި­މީހުން ވަނީ ޖައްސާފައެވެ. ކަލޭގެފާނު ވިދާޅުވާށެވެ! އެއީ، ތިޔަބައި­މީހުންގެ އަމިއްލަ ނަފްސުގެ ފަރާތުން އައި­ކަމެކެވެ.“

އަދި އެކަލާނގެ ވަޙީބަސް­ފުޅުގައި ވެއެވެ. ﴿قُلْ هُوَ مِنْ عِنْدِ أَنْفُسِكُمْ﴾ [އާލު ޢިމްރާން 165] މާނައީ: ”ކަލޭގެފާނު ވިދާޅުވާށެވެ! އެއީ ތިޔަބައި­މީހުންގެ އަމިއްލަ ނަފްސުތަކުގެ ކިބައިން އައި ކަމެކެވެ.“ އަދި އެއީ ޙަޤީޤަތެއްކަން ސާފު­ކޮށް ބަޔާން­ކޮށް­ދެއްވަމުން ﷲ ވަޙީ ކުރެއްވިއެވެ. ﴿وَلَقَدۡ صَدَقَكُمُ ٱللَّهُ وَعۡدَهُۥٓ إِذۡ تَحُسُّونَهُم بِإِذۡنِهِۦۖ حَتَّىٰٓ إِذَا فَشِلۡتُمۡ وَتَنَٰزَعۡتُمۡ فِي ٱلۡأَمۡرِ وَعَصَيۡتُم مِّنۢ بَعۡدِ مَآ أَرَىٰكُم مَّا تُحِبُّونَۚ مِنكُم مَّن يُرِيدُ ٱلدُّنۡيَا وَمِنكُم مَّن يُرِيدُ ٱلۡأٓخِرَةَۚ ثُمَّ صَرَفَكُمۡ عَنۡهُمۡ لِيَبۡتَلِيَكُمۡ﴾ [އާލު ޢިމްރާން 152] ”ހަމަ­ކަށަވަރުން ﷲ، ތިޔަބައި­މީހުންނަށް، އެކަލާނގެ ވަޢުދު­ފުޅު ފުއްދަވައި ދެއްވިއެވެ. އެކަލާނގެ އިޛުނަފުޅާލައިގެން ތިޔަބައި­މީހުން އެ ކާފިރުން ޤަތުލު­ކޮށް ނެތި­ކުރަމުން ދިޔަ ހިނދުގައެވެ. ތިޔަބައި­މީހުން ހިތްއެދޭ ކަންތައް ތިޔަބައި­މީހުންނަށް ތިމަން­ރަސް­ކަލާނގެ ދެއްކެވުމަށްފަހު، ތިޔަބައި­މީހުން އުރެދި، އަދި (ރަސޫލާ އެންގެވި) ކަން­ތަކުގައި ތިޔަބައި­މީހުން ދެބަސްވެ، ފިނޑިވެއްޖައުމަށް ދާނދެނެވެ. ތިޔަބައި­މީހުންގެ ތެރޭގައި ދުނިޔެ އެދޭ މީހުންވެއެވެ. އަދި، ތިޔަބައި­މީހުންގެ ތެރޭގައި އާޚިރަތް އެދޭ މީހުން ވެސް ވެއެވެ. ދެން، އެ ކާފިރުންގެ ކިބައިން ތިޔަބައި­މީހުން އެއްކިބާ ކުރެއްވިއެވެ. އެއީ، ތިޔަބައި­މީހުން އިމްތިޙާނު ކުރެއްވުމަށް­ޓަކައެވެ.“

ފަހެ، މި ސަމާވީ ފަތުވާގައި، ބަޔާން ކޮށް­ދެއްވަނީ، މުސްލިމުންގެ މައްޗަށް ކާފަރުންނަށް ގަދަވެވުނީ، މުސްލިމުންގެ އަމިއްލަ ނަފްސު­ތަކުން އައި ކަންތައް­ތަކެއްގެ ސަބަބުން ކަމުގައެވެ. އެއީ މުސްލިމުންގެ ނާކާމިޔާބާއި، ކަން­ކަމުގައި ދެބަސްވުމާއި، އޭގެތެރެއިން ބަޔަކު ރަސޫލާއަށް އުރެދި، ދުނިޔެ އެދިގެން ކުރި ކަންތައްތަކުގެ ސަބަބުން ކަމުގައެވެ. އެއީ، ފަރުބަދައިގައި ތިބި ތީރު ޖަހާ މީހުން، ކާފަރުން މުސްލިމުންގެ ފުރަގަހުން އައުމަށް ހުރަސްއަޅަމުން ގޮސްފައި، ފުރަތަމަކޮޅު މުޝްރިކުން ބަލި­ވާން ފެށުމުން ޣަނީމާ މުދާ ލިބުމަށް ދަހިވެތިވުމުގެ ސަބަބުންނެވެ. ފަހެ، އެބައި­މީހުންނަށް ލިބެންއޮތް ދުނިޔޭގެ މުދަލަށް­ޓަކައި، ރަސޫލުﷲ ﷺ ގެ އަމުރު­ފުޅު އެއުރެން ދޫކޮށް­ލީއެވެ.

މި ފޮތުގެ އެހެން ބައިތައް